ინტერვიუ ანიტა გერჰარდტერთან

Wings for Life-ის აღმასრულებელი დირექტორი ანიტა გერჰარდტერი პასუხობს ხშირად დასმულ შეკითხვებს საქველმოქმედო ფონდის შესახებ, რომელსაც ის მართავს, საუბრობს ამჟამად მიმდინარე მნიშვნელოვან კვლევაზე და იმაზე, თუ როგორ შეუძლია ნებისმიერ ჩვენგანს, წვლილი შეიტანოს იმ ადამიანთა ცხოვრების გაუმჯობესებაში, ვისაც ზურგის ტვინის ტრავმა აწუხებს.

ანიტა, რატომ არის პირადად თქვენთვის მნიშვნელოვანი ზურგის ტვინის ტრავმის დამარცხება?

ა.გ.: განკურნების საშუალების პოვნა არის საკითხი, რომელიც ჩემს გულთან ძალიან ახლოს დგას. უამრავ ადამიანს ვიცნობ, ვისაც ეს ვერაგი ტრავმა აწუხებს და ძალიან ვაფასებ მათ ფსიქოლოგიურ და ფიზიკურ სიძლიერეს, მათ გამძლეობის უნარს, გაუმკლავდნენ ყოველდღიურ ცხოვრებას, რომელიც სავსეა ბარიერებით, სირთულეებითა და წინააღმდეგობებით. საუცხოო იქნებოდა ამ ადამიანებისათვის სხეულის ფუნქციების უკან დაბრუნება - მაგალითად, რომ თავადვე მოახერხონ სუნთქვა ან თითების მოძრაობა - რაც მათ ცხოვრებას საგრძნობლად გააუმჯობესებდა.

რა ტიპის კვლევას უჭერს მხარს თქვენი ფონდი?

ა.გ.: Wings for Life-ის მიზანია, რომ გამოინახოს ბიოლოგიური აღდგენის სტრატეგიები. ამისათვის, ჩვენ მხარს ვუჭერთ ნებისმიერ მიდგომას, განვითარების სხვადასხვა ეტაპზე. ჩვენთვის გადამწყვეტია, რომ მკვლევართა შემოთავაზებებს ჰქონდეთ პოტენციალი, რომ რეალური სარგებელი მოუტანონ პაციენტებს.

როგორ წყდება პროექტის დაფინანსების საკითხი?

ა.გ.: გადაწყვეტილებას ჩვენ კრიტერიუმთა მთელ წყებაზე დაფუძნებით ვიღებთ. ამათგან ყველაზე მნიშვნელოვანია, რომ კვლევითმა პროექტმა ერთი ნაბიჯით მიგვაახლოვოს განკურნების საშუალების პოვნასთან. იმისათვის, რომ დავრწმუნდეთ, რომ მხოლოდ ასეთ იმედისმომცემ პროექტებს ვაფინანსებთ, ჩვენ შემუშავებული გვაქვს საკმაოდ დახვეწილი შერჩევის პროცესი.   

როგორ შეუძლიათ ადამიანებს კვლევაში ჩართვა?

ა.გ.: ცდები საავადმყოფოებსა და კლინიკურ ცენტრებში მიმდინარეობს, სადაც ხდება პაციენტთა შერჩევა. ყოველი კლინიკური ცდა კონკრეტულ სამეცნიერო საკითხს იკვლევს და ამიტომაც ყოველ კლინიკურ ცდას მასში ჩართვის ძალიან კონკრეტული კრიტერიუმები აქვს. გადაწყვეტილება იმასთან დაკავშირებით, არის თუ არა პაციენტი შესაფერისი ცდებში მონაწილეობისათვის უნდა მიიღოს კვლევითმა ცენტრმა, რომელიც რეკრუტირებას ახდენს, თუმცა, ჩვენი რეკომენდაციაა, რომ ეს გადაწყვეტილება პაციენტმა ჯერ თავის მკურნალ ექიმთან განიხილოს. მონაწილეობა კლინიკურ კვლევებში განსაკუთრებული საყურადღებო საკითხია.

რას ნიშნავს ფონდისათვის Wings for Life World Run?

ა.გ.: შეუძლებელია სიტყვიერად ბოლომდე გამოხატო თუ რამდენად მნიშვნელოვანია Wings for Life World Run ჩვენი მიზნებისათვის. ეს გახლავთ ჩვენი მთავარი საქველმოქმედო ღონისძიება, რომელიც ხელს უწყობს სამეცნიერო პროგრესის დაჩქარებას. გარდა ამისა, იგი მსოფლიოს ყურადღებას მიაპყრობს ჩვენს მიზნებზე.

რა წილი უკავია Wings for Life World Run-ის დროს მიღებულ შემოწირულობებს ფონდის სხვა შემოწირულობებთან შედარებით?

ა.გ.: Wings for Life World Run ჩვენი ყველაზე მასშტაბური საქველმოქმედო ღონისძიება და შემოსავლის მთავარი წყაროა. მისი დამსახურებით, ჩვენ შეგვიძლია, დავაფინანსოთ უმნიშვნელოვანესი კლინიკური ცდები, რომლებიც საკმაოდ დიდ თანხებთანაა დაკავშირებული.

რა თანხის მოგროვება გახდა შესაძლებელი ღონისძიების მეშვეობით დღემდე?

ა.გ.: Wings for Life World Run-ის მონაწილეთა, დონორთა და სპონსორთა გულუხვი მხარდაჭერის მეშვეობით, ჩვენ შევძელით წარმოუდგენელი თანხის, 27,2 მილიონი ევროს მოგროვება ამ დრომდე.

შეგროვილი თანხის რა ნაწილი ხმარდება უშუალოდ კვლევით პროექტს?

ა.გ.: იქიდან გამომდინარე, რომ ჩვენს ადმინისტრაციულ ხარჯებს კეთილი ნების საფუძველზე ფარავს კომპანია „რედ ბული“, ქველმოქმედების შედეგად შემოსული თანხის 100-ვე პროცენტი კვლევით მიზნებს ხმარდება.

როგორ შეუძლიათ ადამიანებს, რომ 2020 წლის 3 მაისამდე და შემდგომშიც თავიანთი წვლილი შეიტანონ ამ საქმეში?

ა.გ.: ბევრი სხვადასხვა საშუალება არსებობს იმისათვის, რომ მთელი წლის მანძილზე მხარი დაგვიჭირონ ადამიანებმა. მათ შეუძლიათ, რომ შემოწირულობა გაიღონ ან უბრალოდ ხმა გაავრცელონ ჩვენი მნიშვნელოვანი მიზნების შესახებ. ჩვენ თითოეული იმ ადამიანის მადლობლები ვართ, ვინც მხარს გვიჭერს!

შეუერთდით ანიტას და Wings for Life-ის ფონდს გლობალურ ინიციატივაში, რათა მოხერხდეს ზურგის ტვინის ტრავმის დამარცხება. დარეგისტრირდით მსოფლიო რბენაზე  ან გაიღეთ შემოწირულობა ნებისმიერ დროს.