მსოფლიო რბენის საოცნებო გუნდები
9 მაისის Wings for Life მსოფლიო რბენის შექმნაში ძალიან დიდი წვლილი გუნდურ მუშაობას მიუძღვის. აპლიკაციით დაკავშირებული გუნდის წევრები ერთად ვარჯიშობდნენ, საკუთარ ისტორიებს ცვლიდნენ და მხარს უჭერდნენ ერთმანეთს მსოფლიო რბენის მსვლელობისას, რომელიც ისტორიაში შევიდა, როგორც ყველაზე მასშტაბური რბენა. გიზიარებთ მხოლოდ რამდენიმე ისტორიას იმ ათასობით გუნდიდან, რომელმაც ზურგის ტვინის განსაკურნებლად მსოფლიოსთან ერთად ირბინა.
მეხანძრეები ზალცბურგიდან
თვალებს არ ვუჯერებდით, როდესაც ავსტრიის პინცგაუს რეგიონის 50-მდე მეხანძრე ფინიშის მანქანას სახანძრო ეკიპირებით აღჭურვილი, 30 გრადუსამდე სიცხეში დაუპირისპირდა. მათი შთაგონების წყარო თავიანთი კოლეგა, ბერნი ფოლანდი გახდა, რომელმაც მთებში, საველოსიპედო ინციდენტის შედეგად ზურგის ტვინი დაიზიანა. სიცხის მიუხედავად, მეხანძრეებს სახიდან ღიმილი არ შორდებოდათ!
გუნდი ემერსონი
ლივერპულში, გაერთიანებულ სამეფოში დაფუძნებულმა ემერსონის გუნდმა ემერსონ გრანტისთვის ირბინა - ბიჭისთვის, რომელმაც სხეულის ქვედა კიდურებზე კონტროლი არაქნოიდული კისტის გამო დაკარგა. 2020 წელს გრანტს სიხარული მაშინ ეწვია, როდესაც ლივერპულის საფეხბურთო კლუბის მოთამაშემ ტრენტ ალექსანდერ-არნოლდმა გააკვირვა ვიზიტით, თუმცა ჭეშმარიტი სიხარული მისთვის ზურგის ტვინის დაზიანების განკურნება იქნება. დედამისი, ანა-მარია დერსლი აღნიშნავს, რომ ამის იმედი მათ სწორად Wings for Life-მა მისცა.
დიახ, ჩვენ შეგვიძლია!
ნიდერლანდელი კენ დელისენი კისერს ქვემოთ მას შემდეგ პარალიზდა, რაც გიმნასტიკის გაკვეთილის ჩატარებისას ტრამპლინის კუთხეს დაეჯახა. სივრცეში იგი სპეციალური ეტლის დახმარებით გადაადგილდება, რომელსაც ნიკაპით მართავს, პარალელურად კი, ცხოვრების მისიად ზურგის ტვინის დაზიანების შესახებ ცნობადობის ამაღლება გაიხადა. კენის საოცარმა ძალამ, სულისკვეთებამ და მხარდაჭერამ საფუძველი ჩაუარა გუნდს სახელად “Yes We Ken!” (სიტყვების თამაში ფრაზაზე “Yes, we can”) და მსოფლიოში არაერთ ადამიანს შთააგონა პირდაპირი ეთერის კადრებში გამოჩენით.
გუნდი შლირენცოიერი- ტიმი
Wings for Life World Run- ის ერთ-ერთი განსაკუთრებული ასპექტი კეთილი მიზნისთვის გაერთიანებული ათლეტებისა და ცნობილი სახეების მხარდამხარ სირბილის საშუალებაა. ავსტრიელი ათლეტების ჯგუფმა თავიანთი ძალები გააერთიანეს და ერთი გუნდის სახელით მონაწილეობდნენ: მოთხილამურე გრეგორ შლირენცოიერი, ჩოგბურთელი დომინიკ ტიმი, პარამოთხილამურე სიმონ უოლნერი და პარაჩოგბურთელი ნიკო ლანგმანი.
DHL Stormers
სამხრეთაფრიკული ქალაქის, კეიპტაუნის სარაგბო გუნდის, DHL Stormers-ის ოთხმა მონაწილემ საკუთარი გუნდი ჩამოაყალიბა, რითიც ზურგის ტვინის დაზიანების კვლევის დაფინანსებაში საკუთარი წვლილი შეიტანა. “მოზარდობისას ჩემი კუმირი მოთამაშე სედრიკ მხიზე იყო, რომელიც საავტომობილო შემთხვევის შედეგად პარალიზდა… ასე შეიცვალა მისი ცხოვრება ერთ ღამეში.” ამბობს Stormers-ის მოთამაშე, სერჟელ პეტერსენი. “ეს კიდევ ერთხელ ნათლად გვაჩვენებს, თუ როგორ გაგვიმართლა, რომ ჯერ კიდევ შეგვიძლია ვაკეთოთ საყვარელი საქმე.”
ირბინე დინებასთან ერთად
Wings for Life მსოფლიო რბენის ნამდვილმა ვარსკვლავმა, გერმანელმა ულტრამორბენალმა ფლორიან ნოიშვანდერმა კიდევ ერთხელ დაგვანახა უდიდესი თავდადება და, რაც ყველაზე მეტად აღგვაფრთოვანებს, თავის გუნდთან, Flow-სთან ერთად ზედიზედ უკვე მეექვსედ მოიგო გუნდის კატეგორიაში. ამჯერად მათ 45,850 კილომეტრი დაფარეს - რაც დედამიწის გარშემოწერილობაზე მეტია!
შემდეგ მსოფლიო რბენაზე რეგისტრაცია უკვე დაიწყო. ჩაინიშნეთ თქვენს კალენდარში 2022 წლის 8 მაისი.
