ზურგის ტვინის დაზიანების მქონე პაციენტმა WINGS FOR LIFE WORLD RUN-ის 120 000-ზე მეტი მონაწილე სტარტის ხაზის გადაკვეთით შთააგონა
ემოციებმა იმძლავრა, როდესაც შვეიცარიელმა დევიდ მზიმ, რომელსაც უკვე წლებია ზურგის ტვინის ტრავმა აქვს, ქალაქ ცუხში დღეს გამართულ გლობალურ Wings for Life World Run-ზე სტარტის ხაზი გადაკვეთა. საყოველთაო მღელვარება მხოლოდ და მხოლოდ რამდენიმე საათის შემდეგ ჩაცხრა, როდესაც რუსმა ივან მოტორინმა და მისმა თანამემამულემ ნინა ზარინამ, 64.37 კმ-იანი და 53.72 კმ-იანი გარბენით, კაცებისა და ქალების კატეგორიებში პირველობა დაისაკუთრეს. ამაღელვებელი მომენტი დევიდ მზის მონაწილეობით წარმოადგენდა მთავარ ღირსშესანიშნაობას რიგით მე-6 ყოველწლიურ საქველმოქმედო ღონისძიებაზე, რომლის მონაწილეებიც ცდილობენ თანხის შეგროვებას ზურგის ტვინის ტრავმის განკურნების გზების საძიებლად. ერთდროული გარბენით, 120 000-ზე მეტმა რეგისტრირებულმა მორბენალმა და ეტლით მოსარგებლემ 72 ქვეყნის 323 ლოკაციაზე 1 103 276 კმ დაფარა.
დევიდ მზი გახლავთ იმისი განსხეულება თუ რატომ არსებობს Wings for Life World Run. ცუხში გამართული რბენის მონაწილეები და მილიონობით მაყურებელი მთელი მსოფლიოს გარშემო სუნთქვაშეკრული შესცქეროდა, როდესაც მზი თავისი ეტლიდან წამოდგა და სიარული დაიწყო. საბოლოოდ, 31 წლის მამაკაცმა 390 მეტრი გაიარა, ვიდრე ღონისძიების ტრადიციული ფინიშის მანქანა წამოეწეოდა. მის მიერ გადადგმული ყოველი ისტორიული ნაბიჯით მზი კიდევ ერთხელ შეგვახსენებდა რეალურ გავლენას, რომელიც ადამიანებმა მოახდინეს ტექნოლოგიურად კომპლექსურ კვლევით მიგნებით, რომლის შესახებაც ცნობილი გასულ შემოდგომაზე გახდა.
როდესაც გაირკვა, რომ იმავე მიმდინარე კლინიკური ცდების თანამონაწილე ხერტ-იან ოსკამი ასევე მიუყვებოდა სტარტის ხაზს თავის მშობლიურ ნიდერლანდებში, მორბენალთა აღტაცებამ კიდევ უფრო იმატა. დასწრების საფასურისა და რბენის დროს მიღებული შემოწირულობების 100% მოხმარდება პროექტებს, რომლებსაც Wings for Life-ის ფონდი უჭერს მხარს. შეგახსენებთ, რომ ფონდი ზურგის ტვინის ტრავმის განკურნებასთან დაკავშირებულ ყველაზე დამაიმედებელ კვლევას აფინანსებს. 2019 წლის რბენის შედეგად მოგროვდა 3,5 მილიონ ევროზე მეტი, თუმცა კიდევ უფრო მეტი თანხის მოგროვება ჯერ კიდევ მიმდინარეობს.
„ძალიან ამაღელვებელია ეს ყველაფერი. ჩემი მაქსიმუმი იყო 6 წუთის განმავლობაში კლინიკის გლუვ იატაკზე სიარული, ამინდის პირობების გათვალისწინების გარეშე. ახლა კი 30 წუთის მანძილზე ვიარე ხუთი-ექვსჯერ შესვენებით, რაც ჩემთვის რეკორდია,“ - აღნიშნა მზიმ, რომელიც სახიდან ღიმილს ვერ იშორებდა მაშინაც კი, როდესაც მხრებზე სეტყვის მარცვლები ეცემოდა, - „სასიამოვნო იყო იმის ნახვა, რომ ადამიანები ააღელვა და შთააგონა ჩემმა ამბავმა, განსაკუთრებით გასაოცარი შეგრძნება იყო, როდესაც დასაწყისში მათ გვერდით ჩავუარე და ტაშს მიკრავდნენ.“
გარბენი მსოფლიო კოორდინირებული დროით 11:00 საათზე 186 ეროვნების აღტაცებულმა მონაწილემ ერთდროულად დაიწყო. ნებისმიერ ადამიანს შეუძლია, შეუერთდეს მსოფლიო რბენას და მონაწილეობა მიიღოს რბენაში ფინიშის მანქანის თანხმებით ან დარეგისტრირდეს Wings for Life World Run-ის აპლიკაციით და ირბინოს ინდივიდუალურად ან სხვებთან ერთად.
თვალშისაცემად განსხვავდებოდა ამინდი და ბუნებრივი პირობები სხვადასხვა გეოგრაფიულ ადგილას, მოულოდნელი თოვით იტალიაში და დაახლოებით 35 °C სიცხით მუმბაიში, ინდოეთში. ფინიშის მანქანების ახალი, 2019 წლის ტემპი დაძაბული ფინიშით დაასრულა ქალთა კატეგორიაში ნინა ზარინამ რუსეთიდან, რომელმაც ცუხში ირბინა. მან სულ რაღაც 0,16 კმ-ით გაუსწრო 2017 წლის მსოფლიო ჩემპიონს პოლონეთიდან დომინიკა სტელმაჩს, რომელმაც რბენაში მონაწილეობა რიო-დე-ჟანეიროში, ბრაზილიაში მიიღო. რუსეთისათვის სრული ტრიუმფით დაასრულა გარბენი იზმირში, თურქეთში, ივან მოტორინმა, როდესაც თავისივე მსოფლიო ჩემპიონობისას მიღწეული შედეგი გააუმჯობესა 64,37 კმ-ის გავლით.
ფინიშის მანქანების მძღოლებს შორის კი იყვნენ ისეთი ცნობილი სპორტსმენები როგორებიც არიან დაკარის რალის ჩემპიონი მატიას უოკნერი (ავსტრია), რეკორდსმენი ტრამპლინიდან ხტომაში ადამ მალიცი (პოლონეთი) და ფორმულა ერთის ლეგენდა დევიდ კოლჰარდი (დიდი ბრიტანეთი). ხოლო მსოფლიო ჩემპიონი მოთხილამურე ჰენრიკ კრისტოფერსენი (ნორვეგია) ვირტუალურ ფინიშის მანქანას „მართავდა“ და მონაწილეებს Wings for Life World Run-ის აპლიკაციიდან უგზავნიდა მილოცვებს. რბენის მხარდამჭერები იყვნენ ისეთი ცნობილი ადამიანები, როგორებიც არიან პლიაჟის ფრენბურთის სენსაცია ედუარდა „დუდა“ სანტოშ ლიშბოა (ბრაზილია), Ironman-ის მრავალგზის გამარჯვებული დანიელა რიფი (შვეიცარია), დაკარის ხუთგზის ჩემპიონი კირილ დესპრესი (საფრანგეთი) და მთის ველოსიპედით რბოლის მსოფლიო თასის მფლობელი იანა ბელომინა (უკრაინა).
Wings for Life World Run მეშვიდედ 2020 წლის 3 მაისს გაიმართება.
